- يابوي سمعت عن المضاربة عند فول (....... ) ..؟ - لا والله وأنا بوك ماسمعت خير.. وش حصل الله يكفي الشر ..؟ - أربعة رجال (تطاققوا) عند الفوال بسبب الطابور. واحد سقط في الدور و»بعدين» واحد ثاني وقامت «هوشة» ..! - وعساهم يابوك ماتصوبوا - إلا.. اثنين ودوهم المستشفى فيهم إصابات بسيطة واثنين سلموا .. - كل هذا بسبب الفول..؟ - يابوي المشكلة ماهي في الفول المشكلة في الناس الذين يتراكضون قبل المغرب ويفقدون أعصابهم ويسبون ويشتمون ويزاحمون ويساقطون والنتيجة «زي» ما أنت شايف ..! وبدل الواحد ما يدخل على أهله بطبق فول يدخل عليهم ورأسه مفقوش .! عسانا لا أكلنا فول إذا صارت المسألة كذا ..! - أي والله صدقت يا ولدي عصر أمس شفت ثلاثة يتساقطون على بعضهم وسب وكلام ما ودك تسمعه ..! -الصيام يا ولدي ماهو بس عن الأكل حتى عن الجوارح وإذا «سبك» أحد قل إني صائم..! - هذا المفروض والذي ما يقدر يمسك أعصابه يجلس في بيته ويريح نفسه ويريح خلق الله..!!