ـ الوووووو ـ هلا وغلا ـ وينك يارجل الأمور من بعد صلاة الجمعة هايصة ولايصة وأنت مسترخي على الأريكة. ـ عسى خير وش اللي صار ترى ساحتنا ساحة قروشة ما نطلع من مشكلة إلا وندخل مشكلة ثانية. ـ تم استبعاد عبدالله العنزي من صفوف المنتخب واستبداله بأحمد الكسار. ـ معقولة يا أخي هذا أفضل حارس بالدوري السعودي ولا له منافس بنوب بنوب. ـ كلامك صحيح لكن الاستبعاد لم يكن فنيا بل إداريا بسبب تأخره عن الانضمام للمعسكر المقام حاليا في الساحل الشرقي ويقال لظروف حجوزات الطيران. ـ ياشيخ قول غير هذا الكلام الشرقية جنب الرياض لو يطلع بسيارة يمكن أسرع من المطارات وزحمتها وتأخر الرحلات وعطل الكومبيوترات. ـ يقولون الحارس ماكان في الرياض مسافر للندن للعلاج. ـ اللي خلاه يروح للندن ما يخليه يرجع منها، بعدين قائمة المنتخب معلنة من بدري وهو لاعب قبل كم يوم ولافيه إلا العافية يارب لك الحمد الله يديمها علينا وعليه. ـ ياعمي وش ذا السوالف الأول وصرفوها بأن وراه زواج وشهر عسل، والثاني حجوزات طيران.. هل أصبح المنتخب في المرتبة الثانية من حيث الأهمية؟ ـ إلا قل هل أصبحت الأندية أقوى من المنتخب ومسيطرة عليه. ـ بصراحة الوضع أصبح لايطاق وتجاوزت التجاوزات الحدود المسموح بها. ـ تبي العلم الوكاد .. تراك ضيّقت صدري. ـ أفا ليش؟ ـ من الظلم أن تخسر الكرة السعودية حارسا متألقا بسبب تصرف غير مسؤول. ـ وشلون تخسره. ـ أكيد بيوقفونه مثل ماوقفوا حسن معاذ مباراتين وإلا إلى نهاية الموسم مثل ماسووووا مع خالد عزيز والمصيبة أن يشطب. ـ يشطب مرة واحدة. ـ سبق وشطبوا عساف القرني بعد ما تأخر عن الانضمام لمعسكر المنتخب. ـ أقول فال الله ولا فالك إلا أقول تبطي عظم قال يشطب قال. ـ يارجل هذا تأخر عن معسكر المنتخب وعن أداء مهمة وطنية والعذر غير مقنع. ـ كيف غير مقنع ؟ ـ المفروض مايروح للندن على مزاجه والنظام يقول إذا كان اللاعب مصاب يرفع ناديه خطاب مرفق معه التقرير الطبي ويحضر اللاعب للمعسكر ويتم الكشف عليه فإن كانت الإصابة سهلة يبقى وإن كانت مدة علاجها طويلة يتم استبعاده كما فعلوا مع خالد الغامدي وسالم الدوسري سابقا. ـ سالم تقصد يوم جاء بعكاز. ـ تصدق كنتوا أبطال يوم اشغلتوا الرأي العام بسالفة العكاز ليش ماتعيدون الكرة وتسوووووون سالفة تذكرة ـ انهبلت أنت سالفة التذكرة والحجوزات ماهي من صالحنا مثل سالفة العكاز. ـ المهم فكنا من هالسواليف متى مباراة حبيب القلب يالوجه السموح. ـ طوط طوط طوط طوط طو طوط. الهاء الرابعة بعض العرب ودك تحطه بجنبك وبعض العرب ودك تحطه على جنب وبعض العرب شوفه ينسيك ذنبك وبعض العرب شوفه يسبب لك الذنب