آآآآه يا رجولي آآآآه يا ظهري، ايشبك ياسيدي سلامة رجولك وظهرك ايش اللي حصل؟ الواحد ايش يقول بس إلا أمري وخيرتي لله حقون وزارة التجارة ان ما يتعبوا ويغلبوا الأوادم ما يرتاحوا رجولي ورمت وبققت وظهري انكسر من كتر البرم واللفلفه.. اقوله فهمني ايش اللي حصل جلس يبربر، هاتي كاسه شربيت خليني أبل ريقي وانا أفهمك.. وهادي كاسة الشربيت ياسيدي، هيا ركزي معايا واسمعي ايش رايح اقول ياستي، من العصرية وانا ابرم مع جارنا العم معتوق عشان نشتري مكيفات لشقة ولده لانه ولده زواجه بعد شهر زي منتي عارفه.. صح كده ياسيدي زواجه بعد شهر، ويحمد ربه عم معتوق انه ولده حيسكن في عمارته والا كان ولده ورط زي الغلابا اللي بتستنى الارض والقرض، والله عالم متى حيكون رقمه، ماعلينا المهم ياستي نزلنا سوق الادوات الكهربائية وكل ما ندخل معرض لبيع المكيفات ونسأل البياعين يجينا الرد منهم انه المكيفات انسحبت من الاسواق لانه جاهم قرار من وزارة التجارة بسحب كل مكيفات عام 2013 من المعارض لانه المكيفات اللي بتبيعها مخالفة لبطاقة كفاءة الطاقة واللي يفتشوه ويلاقوا عندو هادي المكيفات حيبهدلوه ويغرموه لحد 500 الف وحيكون يومه اسود.. ياساتر ليه كده بس ياوزارة التجارة ؟ شايفة كيف لنا سنيين وسنيين ونحنا بنستخدم كل انواع وموديلات المكيفات اللي موجوده في السوق، سواء كانت مكيفات شبابيك او مكيفات سبليت، وتجي بعد كل هادي السنوات وزارة التجارة تقول انه هادي المكيفات مخالفة لبطاقة كفاءة الطاقة.. طيب ياسيدي دحين مافي مكيفات في السوق؟ في معارض جالسه تستنى الانتاج الجديد يجيها، وفي معارض عندها الانتاج الجديد ابو نجوم.. ايش يعني ابو نجوم ياسيدي؟ يعني في مكيفات فيها 3 نجوم وفي مكيفات فيها 4 نجوم، وفي مكيفات فيها 5 نجوم (هادي مو مكيفات هدا منتخب البرازيل ) لانه ياستي كلما زادت النجوم قل توفير الطاقه وطبعا ياستي السعر بيزيد كلما زادت النجوم، والمصيبة مو هنا المصيبه في فاتورة الكهرباء حتكون زي ماهية 500 ريال في الشهر، سواء زادت النجوم أو قلت... يعني على كده يا سيدي عم معتوق ما اشترى مكيفات؟ لا ما اشترى بس سأل عن مراوح السقف والجلاسي ولمن عرف انه حكاية كفاءة الطاقه والنجوم مو داخله فيها قال للبياع اعطيني عشره مراوح بلا مكيفات بلا هم ووجع قلب.. وعيشوا كتييييير تشوفوا كتييييير.. تويتر F_HALWANI@