أهالي الأحساء: زيارة أمير الشرقية تؤكد على تلاحم القيادة والشعب
- Sep 16 2015 12:00AM
- جريدة اليوم
الشوو والكلام الفاضي والمكرر هاي سالفة بالله عليكم.. يعني احنه الحين ما عندنه الا التصريحات الفاضية اللي نقولها حق الجرايد بس عشان نسجل حضور وتطلع صورنه في الجرايد.. آنه الصراحة منبطه جبدي على مسئولينه ذلين من تبطل الجريدة الا تصريحات ومرة يأشر جذي ومرة يأشر جذاك وتقول والله صج هالمسئول ولين ييت حق الفعل تلقاه قول بليا فعل.. انزين ليش يا ولد الخاله كل هالتصريحات والنفخه في الجرايد وانت عارف نفسك وعارف اتحادك وناديك انكم فشوش.. والله لو بيدي جان سويت نظام حق اللي يصرحون في الجرايد لأنه الناس اللي قاعده تقراه غير اللي تشوفه.. يعني معقولة مسئول في اتحاد او نادي يصرح ويؤكد ويلعلع انه منتخبه وفريقه بيسوون وبيفعلون وفي الاخير حتى نتايج خسايرهم ما يطرشونها للجرايد عشان يدارون فشلهم.. ولا عقب اسبوع تلقاه يطلع لك بنفس الويه بتصريح يديد بدأنا الاعداد للبطولة الفلانية وننتظر كذا وعندنا كذا ووقت البطولة ياك في التوش وسكت ولهف فلوس من الدولة معسكرات ومشاركات وتجهيزات والنتيجة خلها على صوب. آنه ابقي اعرف شنهي المعايير اللي مخلينها مسئولينه في الرياضة حق مشاركات الاتحادات والفرق في البطولات الخارجية والمعسكرات التدريبية.. لانه الصراحة في اتحادات واندية ما تسوه بيزه وما تستاهل اللي تحصله وفي اتحادات واندية يستاهلون من يوقف معاهم ويدعمهم عشان يحققون النتايج اللي تشرفنه وتشرف ديرتنه.. ما ابقي اطول وايد بروحه اليوم الاحد وملل اول يوم في الاسبوع بس يا مسئولين الاندية والاتحادات اللي عندنه عندكم شي عدل كتبوه وفيدونه ما عندكم شي فضلونه بسكوتكم ما نبي كل يوم نفس الويوه في الجرايد على كلام فاضي بس تره اليوم الناس صارت تفهم مو نفس اول يمشون اللعب وياكم ويصدقونكم.. اليوم كلشي يبين وواضح اما تصف لنه كلام وتضبط ويا الصحفي عشان يقول حق الناس شوفو هالمسئول تره موجود ويشتغل لا يبه ما نبي شغل بوربتين ذي عندك شغل خل الناس تشوفه وتحكم ما عندك شي لا تيود الجرايد وتعور راسنه على ولا شي.
طلاق مع وقف التنفيذ
- 20 قراءة
- المنطقة الشرقية
