الدمام – علي اليوسف مساحة يومية ( ندردش ) فيها مع نجوم الملاعب والشخصيات الرياضية والاعلامية وضيفنا اليوم رئيس نادي الخليج فوزي الباشا : - اليوم موعد لقاء النصر الهام ؟ ولاعبونا جاهزون للموقعة لأن أكرر أن فريقنا بيدخل المباراة بدون ضغوط . - بأمانة هل أنتم خائفون من الجانب التحكيمي ؟ اذا كنت تقصد أخطاء الحكم فهذا شيء طبيعي وأي رئيس ناد يتخوف من أخطاء الحكام لكن أتمنى أن يكون الحكم عند حسن الظن خاصة وان المباراة جماهيرية وأتوقع أنها راح تطلع بمستوى مميز خاصة ون الخليج راح يلعب مع فريق كبير مثل النصر مستواه يتصاعد في دوري جميل الأمر اللي خلاه يكون في صدارة الدوري والخليج هو الآخر يتواجد مع فرق المقدمة في دوري ركاء. - ولكن الحضور الجماهيري راح يدعم خزينة النادي ؟ اتمنى هالشيء يحصل لأن جمهور النصر كبير والجماهير اللي راح تزحف تساند الخليج وجمهور النادي أيضا كبير ومن حق الخليج ان يدعم خزينته يصير لها وحق من حقوقنا لأن هذي المباراة فرصة بالنسبة لنا اعلاميا وماديا وجماهيريا. - يقولون إن سبب هزيمتكم الأخيرة من الدرعية في دوري ركاء تفكير لاعبيكم في مواجهة النصر ؟ كلام غير صحيح لأن لاعبينا راح ندخلهم مباراة النصر بدون ضغوط والجاهز راح يلعب المباراة مثل المباريات السابقة وبالعكس لاعبونا يفكرون بمباريات ركاء أكثر من التفكير في مباراة النصر لأن دوري ركاء هو أساس الصعود الى دوري جميل للموسم القادم ، والبعض يخلق أوهاما ضد لاعبينا وهي غير حقيقية. - لقيتم بعض الدعم من رجال الأعمال بعد مباراة الاتحاد كيف تراه ؟ دعم لاباس فيه ونشكر كل الداعمين لكن نتمنى اكثر وأكثر خاصة وأن دوري ركاء يحتاج لمثل هذي الوقفات القوية من الجميع ، والدعم نتمناه في كل وقت ولايرتبط بالفوز على فريق عريق أو بمسابقة كاس ولي العهد فقط لأن الخليج يشارك في مسابقات اخرى ومن حقه أن يجد الدعم حتى في تلك المسابقات. - بصراحة هل تتوقع تفوز على النصر ؟ وليش مانفوز ؟ قلت لك راح تدخل المباراة بدون ضغوط على لاعبينا والفوز حق مشروع لنا وللنصر واللي راح يلعب ويخدم الكرة ويحترم الخصم راح يفوز واذا فاز النصر فهو فريق كبير ، واذا فزنا فهذا امر طبيعي ومادام وصلنا لهذي المرحلة من البطولة فمن حقنا أن نتفاءل بالفوز. - تتوقع تجدون تعاطفا من جمهور الأندية الأخرى وتشجعكم ؟ الخليج فريق عريق وعنده قاعدة جماهيرية كبيرة في المنطقة وهذا شيء ماينكره أحد ولو جاءت الجماهير التابعة للأندية الأخرى تساندنا فهذا من حقهم ونرحب بالجميع أنهم يكونوا معانا لكن اردد وأقول إن جمهور الخليج كبير وقادر أنه يملأ جزءا كبيرا من مدرجات ملعب الأمير محمد بن فهد ويقول كلمته أمام النصر.