يلا زين طلعنه الاخير في بطولة الناشئين الخليجية مالت كورة القدم ولا يقولك المنتخب مالنه اصر انه ما يفوز وانه لازم يطلع الاخير ولا يزعلون اخوانه الاماراتيين .. يلا ما قصرتو يا عيال على اللي تعبكم وجهدكم اللي قدمتوه في البطولة ومشكور يا ولد عبدالنبي على شغلك ويزاك الله خير ومثل ما قلت احنه نبني فريق للمستقبل وانشالله مستقبل كرتنه طيب بالعمل اللي الطيب اللي حققته مع افضل اللاعبين عندنه في هالعمر .. تره المركز الاخير يعتبر انجاز ولا شنو ؟! آنه يالربع ما ابي اقسي على الصغيرات مالنه ولا ابي اقول انها مو يديدة القصة والفشل اللي يتحقق لنه بين فترة والثانية ومو في كورة القدم وبس لا حتى في السلة قبل اسبوعين تكلمت وقلت وفي الطايرة بعد نفس الحالة .. المشكلة يالربع في اتحاداتنه ايه في اتحاداتنه .. كل همنه في المنتخبات الكبار وننسى منتخبات الفئات اللي اهية الاساس واهية المستقبل .. يعني احنه اليوم شنو بيصير فينه اذا كانت عندما منتخبات فئات ينحط لها مدربين عدلين مواطنيين او اجانب اهم شي يكونون مدربين اللاعبين يستفيدون منهم .. وخذينه هالفرق وعسكرنه فيهم برع وسوينه لهم معسكرات ولاعبناهم مباريات قوية وخليناهم يحتكون عدل وصقلناهم عشان يجون ويحققون نتايج زينة تشرف ديرتنه فيها ونرفع راسنه فوق في عيالنه. آنه اعرف الكل بيطلع لنه وبيقول ما عندنه ميزانيات حق الفئات وما نقدر نسوي خطط طويلة وعطونه فلوس بنشتغل لكم والاعذار الدايخة اللي كل مرة يطلع لنه فيها واحد من المسئولين يبرر فشله وفشل منتخباته .. والله يالربع لو يعطونهم مال قارون كل هاي الاتحادات ما منهم فايدة لأنهم بس يفكرون في الكبار اما الصغار آخر همهم .. روحو تعلمو من الاتحادات اللي يمكم شوفوهم شلون يهتمون بالصغيرات والفئات ما يقطون السالفة على الحظ ان صابت يابت وان خابت عليها العوض .. يايبه رتبو اوراقكم صح واشتغلو صح وتركو عنكم الشغل الفاضي مال المناسبات اللي ما يودي ولا اييب تره هاي اسم بلد واللي مو قد المسئولية يروح بيتهم احسن الكلام لكم كلكم يا مسئولين في كل الاتحادات الرياضية .. اليوم الجمعة حتى الواحد نفسيته تتعب لما يتكلم عن هالمشاكل اللي ما تخلص في رياضة وطن تحتاج الى رعاية .